– Kort om di bedrift! Kva jobbar de med her i Florø? Har de eit ekstra gøy prosjekt de vil nemne?

Enivest leverer i hovudsak internett og Telia Play til både privat- og bedriftsmarknaden, men støttar og gode prosjekt som set Sogn og Fjordane på kartet og aukar kompetansen til næringslivet og bu-lysta i distrikta. Flora U40 sitt mål samsvarer godt med verdiane til Enivest som har stort fokus på levende lokalsamfunn, nett der du bur. 

Enivest er ein aktør som bygger ut fiber i mange krikar og krokar i regionen vår, jfr. «Der ingen skulle tru at nokon kunne få fiber». Vi har hatt ei målretta utbygging over mange år, ut frå eit ønske om å sikre framtidsretta kommunikasjon i heile fylket. Øya-pakken i Flora med levering av fiber til dei mange øyane (Fanøy, Reksta, Skorpa, Hovden etc.) har vore krevjande, men samtidig eit spennande prosjekt. Utfordringa har vore fellesføringane med utbetring og utskifting av andre sine straum- og telefonstolpar, noko som har teke tid. Det har og vore mykje arbeid med legging av sjøkablar i området, men det glade bodskap om at alle kundane var leverte kom i slutten av 2020.

Enivest har fleire tilsette som kjem ifrå Florø. For å sleppe lang reiseveg, så har vi opna eit avdelingskontor på Peak Florø, der 3-4 tilsette vil vere tilstades i Peak-klynga. Her får dei moglegheit til å mingle med andre gründerar og etablerte bedrifter, noko som kan skape nysgjerrigheit og grobotn for nye idear og tilsettingar. Kundane i Florø blir likevel serva av kundesenteret i Førde.

– Kva er det finaste med Florø?